EDITORYAL — Dako og apason ang DepEd

Karong adlawa opisyal nga magsugod ang klase sa mga pangpublikong eskuylahan dinhi sa nasud. Gipaabot sa Department of Education nga karong school year 2025-2026 moabot og 27.6 milyones ka mga estudyante ang motungha sa basic education.

Apan ang pangutana, nasolusyonan na ba kaha ang kulang nga 165,000 ka mga classrooms ug 56,000 ka magtutudlo, kakulangon sa mga learning materials, laboratoryo, visual aids para sa mga tinun-an?

Ang DepEd maoy dunay pinakadako nga budget sa tanang departamento sa gobiyerno kay mao kini ang nakalatid sa Batakang Balaod o Konstitusyon sa Pilipinas.

Apan hangtud karon, daw dili maapas sa maong departamento ang pagpahimo og daghang school buildings para masulod ang tanang mga estudyante nga di kinahanglang buak-buakon ang mga oras kada adlaw?

Angay hinuong dayegon ang DepEd ubos sa pamunoan karon ni Secretary Sonny Angara tungod sa sayong paghatud sa mga gikinahanglang 33,539 laptops para sa mga magtutudlo, 5,360 laptops para sa non-teaching staff, ug dul-an 26,000 Smart TV packages ug external hard drives niini para sa mga classrooms kay makatabang na kini og gamay.

Ang DepEd adunay sobra 800,000 ka magtutudlo, kaning kapin 33,000 ka laptops kuwangon gihapon kini. Samot na ang 26,000 Smart TVs kuwangon gyud gihapon.

Ang DepEd nagtinguhang magpatabang sa pribadong sektor aron mapun-an og 105,000 ang mga classrooms pinaagi sa Private-Public Partnership ug ingon man sa DPWH.

Pagkatinuod, dako na kaayo ang apasonon pagpatukod og mga school buildings, kay kada tuig, nagkadaghan ang mga batang motungha.

Gawas sa mga nahaunang mga kakuwangon nga nakita, naa pay lain, ang educational system aron makaparang ang kamahoan sa mga batang Pilipino sa ubang mga nasud sa kaparehas nila og edad.