Husay ni Sara

Nahugno ba lang pag-ayo ang mga grupo nga kusganong niduso sa pagkonbikto ni Bise Presidente Sara Duterte nga para nila mamatay na ang impeachment trial human gibalik sa mayoriya sa mga senador ang articles of impeachment ngadto sa House of Representatives?

Sa pikas nga bahin, nasobrahan ba lang ang kamasaligon sa mga sakop sa panel of prosecutors sa House of Representatives nga, bisan sa pag-uli sa articles of impeachment ug pagpangayo og certification sa Senado nga wala malapas ang 1987 Constitution, nakasugod ug busa dili na kapugngan ang impeachment trial?

 -o0o-

Mahimong sakto ang duha ka nagkasungi nga mga panghunahuna. Ingon ana katandugon ang politikanhong proseso sa impeachment nga mahimong mabira bisan unsang orasa ngadto sa bisan asang direksyon agad sa mga maniobra sa nagkabangga nga mga puwersa.

Dili mopahuway ang mga grupo nga supak sa impeachment trial sa dili pa ug bisan human na sa pagsugod sa husay kon madayon karong Hulyo 30. Dili sab mangiyugpos ang mga grupo nga determinadong moduso sa husay pagmatuod nga bisan ang labing gamhanang mga opisyal mapugos pagtubag sa mga pasangil batok nila.

 -o0o-

Mahimong matuman ang pasalig sa mga eksperto sa balaod nga human na-convene ang impeachment court, nga nisugo na sa bise presidente pagtubag sa articles of impeachment, ug nakakuha na og hurisdiksyon sa kaso ug sa sinumbong, segurong dunay husay sa 20th Congress.

Pero ang napakyas nga motion to dismiss ni Senador Bato dela Rosa niadtong Martes mahimong sundan og mas daghang mga lakang sa impeachment court o sa Korte Suprema aron mabasura ang kaso.

-o0o-

May sukaranan ang mga pasidaan nga ang boto sa Senado nga 18-5 sa pag-uli sa articles of impeachment ngadto sa House maoy timaan nga walay igong suporta sa pagkonbikto sa bise presidente. Maong walay kapuslanan ang pagpamugos sa husay.

Pero kapanaminan sang impeachment trials nilang kanhi presidente Joseph Estrada sa 2001 ug anhing chief justice Renato Corona sa 2012: Mayoriya sa mga senador nisuporta sa mga sinumbong sa pagsugod sa husay; pero tungod sa paugat sa mayoriya sa husay ni Estrada ug tungod sa makapakugang nga mga ebidensiya sa husay ni Corona, napalagpot si Estrada ug nakonbikto si Corona.